शक्तिशाली डलरको सामना गर्न एसियाली सेयर बजारलाई मुश्किल पर्दै

४० वर्ष यताकै उच्च भएको मुद्रास्फीति नियन्त्रण गर्न अमेरिकी केन्द्रीय बैंकले औसत बयाज दर वृद्धि गरेपछि डलर दुई दशक यताकै उच्च हुन पुगेको छ । औसत ब्याज दरमा आएको वृद्धि र शक्तिशाली भएको डलरको सामना गर्न एसियाली सेयरबजारलाई मुश्किल परेको छ ।

सेयरबजार मापनका सूचांकबाट प्राप्त तथ्यांक अनुसार सन् २०२२ को पहिलो त्रैमासमा नै एसियाली सेयरबजारले संघर्ष गरिरहेको पुष्टि भएको हो । जापान बाहिरका एसिया प्यासिफिक देशहरुको वृहत सूचांक मापक एमएससीआई पहिलो त्रैमासमा १० प्रतिशतले ओरालो लागेको छ ।

यसैगरी जापानको सेयर सूचांक निकेई ५ प्रतिशतले घटेको छ भने जापानको औद्योगिक कम्पनीहरुको सेयर ७.२ प्रतिशतले घटेको छ । यसैगरी चिनियाँ ब्लु चिप्स १.६ प्रतिशतले ओरालो लागेको छ । जेपी मोर्गनका विश्लेषकहरुले कोभिड–१९का कारण चिनियाँ अर्थतन्त्र प्रभावित भएता पनि, कोभिड पछिको समयमा चिनियाँ अर्थतन्त्रले बाउन्स ब्याक गर्ने बताएका छन् ।

एसियाली सेयर मार्केट मात्रै नभई डलर बलियो हुँदा अमेरिकी एस एन्ड पी ५०० सूचांक यस त्रैमासमा १६ प्रतिशतले ओरालो लागेको छ भने नास्डाक २१ प्रतिशतले घटेको छ । आज एस एन्ड पी फ्युचर्स र नास्डाक फ्युचर्स दुवै ०.४ प्रतिशतले आरालो लागेका छन् भने युरोस्टक्स५० फ्युचर्स र एफएटसीई फ्युचर्स सूचांक ०.५ प्रतिशतले घटेको छ ।

अमेरिका, बेलायत लगायतका केन्द्रीय बैंकहरुले औसत ब्याजदरमा वृद्धि गर्दा प्यानिक भएका लगानी कर्ताहरुले व्यापक रुपमा सेलअफ गर्दा विश्व सेयरबजारले बियरिस ट्रेन्ड समाएको छ । लगानीकर्ताहरुको आर्कषण सुरक्षित उपकरण तर्फ बढेको छ । औसत ब्याजदर वृद्धि हुँदा अमेरिकी ट्रेजरी तथा बन्डको कुपन रेट बढ्दा लगानीकर्ताहरुले बन्डमा लगानी गरिरहेका छन् ।

? समग्र अर्थतन्त्र र शेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।