ट्वीटर विरुद्ध मुद्दा दायर गर्नेको सङ्ख्या बढ्दै

सामाजिक सञ्जाल ट्वीटर विरुद्ध मुद्दा दायर गर्ने कर्मचारीहरुको सङ्ख्या बढ्दै गएको छ ।

सन् २०२२ मा एलन मक्सले ट्वीटर अधिग्रहण गरेपछि ८ हजार बढी कर्मचारीहरुलाई बर्खास्त गरेका थिए । कुनै पूर्व जानकारी बिना नै कामबाट निकालिएको र कामबाट निकाल्दा क्षतिपूर्ति स्वरुप दिने भनिएको रकममा कमी आएपछि कर्मचारीहरुले ट्वीटर विरुद्ध मुद्दा चलाएका हुन् ।

बिबिसीका अनुसार ट्वीटर विरुद्ध मुद्दा हाल्ने कर्मचारीहरु १०० भन्दा बढी रहेको र एकीकृत रुपमा उनीहरुले मुद्दा दायर गरेका छन् । बिबिसी वल्र्ड सर्भिसको टेक टेन्ट कार्यक्रममा ट्वीटर डेभलपर प्लाटफर्मका प्रोडक्ट प्रमुख आमिर सेभातले ट्वीटरमा एलन मक्सले राम्रो नेतृत्व गर्न नसकेको बताएका छन् ।

१५० जना स्टाफको विभाग सम्हालिरहेका उनी र उनको विभागमा काम गरिरहेका कर्मचारीहरुलाई कुनै पूर्व जानकारी र सल्लाह बिना नै कामबाट निकालिएको उनले बताएका छन् । यस्तै रोजगारी सम्झौता पत्रमा कम्पनीबाट निकालिएको अवस्थामा ४ महिनाको तलब बराबरको रकम दिने सर्त भएता पनि ट्वीटरले बिना स्पष्टीकरण मात्रै एक महिनाको तलब दिएको कर्मचारीहरुको गुनासो रहेको छ ।

कर्मचारी कटौती गर्ने समयमा एलन मक्सले कम्पनी टाट पल्टिने अवस्थामा छिट्टै पुग्ने जनाएका थिए । तथापि ८ हजार बढी कर्मचारी कटौती पछि कम्पनी राम्रो दिशा तर्फ निर्देशित रहेको उनले बताउँदै आएका छन् ।

ट्वीटर विरुद्ध पहिलो मुद्दा घानाको ट्वीटर कार्यालयमा कार्यरत कर्मचारीहरुबाट दायर भएको थियो । त्यस लगत्तै अरु कर्मचारीहरुले पनि ट्वीटर विरुद्ध मुद्दा गर्दै आएका छन् ।

एलन मक्सले ट्वीटर अधिग्रहण गरे लगत्तै उनले ८ हजार कर्मचारी हटाएका थिए । यस्तै उनले ट्वीटरको विज्ञापन नीतिलाई पनि परिवर्तन गरेका थिए ।

विज्ञापनमा निर्भर रहेको ट्वीटरको आम्दानीलाई उनले कटौती गर्दै विज्ञापनको सङ्ख्यामा कमी गर्ने र ब्लु टिक प्रयोगकर्ताहरुबाट मासिक ८ डलर देखि ११ डलर सम्म शुल्क लिने नीति बनाएका छन् ।

मक्सले गरेका परिवर्तनकै कारण ट्वीटरको आम्दानी निरन्तर घट्दो क्रममा गइरहेको छ भने एलनलाई ट्वीटर अधिग्रहणमा सघाएका विभिन्न संस्थागत सेयरधनीहरु असन्तुष्ट रहेका छन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।