सानिमा मिडिल तमोरको आईपीओ बुधबार बाँडफाँड हुँदै, कतिले हात पार्छन् ?

सानिमा मिडिल तमोर हाइड्रोपावरले सर्वसाधारणमा जारी गरेको आईपीओ चैत ८ गते बुधबार बिहान बाँडफाँड हुने भएको छ । कम्पनीको सेयर बिक्री प्रबन्धक सानिमा क्यापिटलका अनुसार बुधवार बिहान १० बजे क्यापिटलको कार्यालयमा आईपीओ बाँडफाँड हुनेछ ।

धितोपत्र निष्कासन तथा बाँडफाँड निर्देशिका बमोजिम हुने बाँडफाँडमा कम्पनीको आईपीओ ४ लाख २४ हजार ८९३ जनाले हात पार्नेछन् । जसमा भाग्यशाली ८ जनाले ११ कित्ताका दरले र ४ लाख २४ हजार ८८५ जनाले १० कित्ताका दरले हात पार्नेछन् ।

कम्पनीले फागुन २६ गतेदेखि ३० गतेसम्म आम सर्वसाधारणमा ४२ लाख ४८ हजार ९८३ कित्ता सेयर बिक्रीमा ल्याएको थियो । कम्पनीको आईपीओमा अन्तिम दिनसम्ममा १४ लाख १२ हजार १३ जनाले १ करोड ६२ लाख ४० हजार ९४० कित्ताका लागि आवेदन दिएका थिए ।

कम्पनीको जारी पूँजी ३ अर्ब ३३ करोड २५ लाख रुपैयाँको १५ प्रतिशत अर्थात् ८९ करोड ९८ लाख ७५ हजार रुपैयाँ बराबरको ४९ लाख ९८ हजार ७५० कित्ता साधारण सेयर सार्वजनिक निष्कासनमा ल्याइएको हो । जसमध्ये १० प्रतिशत अर्थात् ४ लाख ९९ हजार ८७५ कित्ता वैदेशिक रोजगारीमा रहेका नेपालीहरूका लागि र ५ प्रतिशत अर्थात् २ लाख ४९ हजार ९३६ कित्ता सामूहिक लगानी कोषहरूको लागि बाँडफाँड गरिएको छ ।

कम्पनीले ताप्लेजुङमा ७३ मेगावाट क्षमताको मध्य तमोर जलविद्युत् आयोजना निर्माणका लागि पुँजी जुटाउनका लागि आईपीओ जारी गरेको हो । आईपीओ निष्कासनपछि कम्पनीको चुक्ता पुँजी ३ अर्ब ३३ करोड २५ लाख रुपैयाँ पुग्नेछ । आयोजनाको कुल लागत १३ अर्ब ३३ करोड रुपैयाँ छ । ७३ मेगावाट क्षमताको उक्त आयोजना आगामी २०८० भदौ २६ गतेसम्ममा आयोजना सम्पन्न गर्ने लक्ष्य छ ।

आयोजनामा गरिएको सेयर पूँजीमा लगानी फिर्ता हुने अवधि (पे ब्याक पिरियड) सम्बन्धी अवधिमा साधारण लगानी फिर्ता हुने अवधि ६.७३ वर्ष र डिस्काउन्टमा लगानी फिर्ता हुने अवधि १३.३६ वर्ष रहेको छ । यस्तै खुद नगद प्रवाह २० लाख १८ हजार ४०० रुपैयाँ र आन्तरिक प्रतिफल दर (आएआरआर) १३.७८ प्रतिशत तथा बट्टादर ११ प्रतिशत रहेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।