फेडले ब्याजदर नबढाउँदै सेयर बजार घट्दो क्रममा, डलर शक्तिशाली हुँदा अन्य मुद्रा कमजोर

अमेरिकी केन्द्रीय बैंक फेडरल रिजर्भ (फेड) ले औसत ब्याजदर बढाउनु अघि नै विश्व सेयर बजार ओरालो तर्फ लागेको छ ।

फेडले औसत ब्याजदर बढाउने निर्णय गरेसँगै डलर निरन्तर रुपमा शक्तिशाली भएको छ भने अरु देशका मुदा कमजोर सावित भएका छन् ।

फेडले ब्याजदर बढाउने निर्णय गरेसँगै एस एन्ड पी -५०० सेयर सूचांक एकै सातामा ५ प्रतिशतले घटेको छ । यसैगरी नास्डाक फ्युचर्स ०.५ प्रतिशतले घटेको छ ।  गत हप्ता ३ प्रतिशतले ओरालो लागेको जापान बाहिरको एसिया प्यासिफिक क्षेत्रको बृहत सूचांक आज ०.३ प्रतिशतले बढेको छ ।

सेयरबजार निरन्तर ओरालो लाग्दा दुई वर्षीय ट्रेजरी इल्डको कुपन रेट सन् २००७ यताकै उच्च ३.९२ प्रतिशत हुन पुगेको छ । यसैगरी डलर शक्तिशाली हुँदा पाउन्ड स्ट्रलीङ्ग, युरो लगायतका मुद्रा कमजोर भएका छन् । पाउन्ड स्ट्रलीङ्ग डलरको तुलनामा ३७ वर्ष यताकै कमजोर हुन पुगेको छ । आज १ पाउन्ड स्ट्रलिङ बराबर १.१३९६ डलरमा पाउन्ड स्ट्रलिङ र डलरको विनिमय भइरहेको छ ।

यसैगरी यूरो र अमेरिकी डलरबीच १ यूरो बराबर ०.९९९१ डलरमा विनिमय भइरहेको छ । आज जापानी येन र अमेरिकी डलरबीच १ डलर बराबर १४३.२५ येनमा विनिमय भइरहेको छ ।

ब्याजदर बढाउँदै जाँदा अमेरिकी ट्रेजरी इल्ड बढ्दै गएको र बेरोजगारी दर ३.५ प्रतिशतबाट बढेर ४–५ प्रतिशत सम्म पुग्ने विश्लेषण बैंक अफ अमेरिकाले गरेको छ । ब्याजदर बढ्दै जाँदा लगानीकर्ताहरुको मनोबल कमजोर हुने भएकाले आगामी दिनमा एस एन्ड पी सूचाङ्क घटेर न्यून बिन्दुमा पुग्ने चेतावनी बैंक अफ अमेरिकाले दिएको छ ।

बुधबार बस्ने फेडको बैठकले कति बिन्दुले बयाजदर बढाउने निर्कौल गर्ने छ । फेडले यसअघि लिएको आक्रामक कदमबाट ब्याजदर ०.७५ प्रतिशत या १ प्रतिशतले बढ्ने अनुमान विश्लेषकहरुले गर्दै आएका छन् ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।