पाँच देशमा मूल्यवृद्धि शतप्रतिशत भन्दा धेरै, जिम्बाब्बे शीर्ष स्थानमा

भूराजनीतिक तनावका कारण सिर्जित आपूर्ति श्रृङ्खला अवरोध, पेट्रोलियम तथा प्राकृतिक ग्यासको मूल्यमा भएको वृद्धिका कारण अधिकांश देशहरुको मूल्यवृद्धि दर दोहोरो अंकमा पुगेको छ ।

विश्व महामारी कोभिड– १९ संक्रमण फैलिएपछि अघिल्ला वर्षहरुको तुलनामा सन् २०२२ मा विश्वव्यापी रुपमा मूल्यवृद्धि दर बढेको हो । पाँच देशको मूल्यवृद्धि शतप्रतिशत भन्दा माथि रहेको छ ।

भिजुअल क्यापिटालिस्ट डटकमका अनुसार विश्वमा सर्वाधिक मूल्यवृद्धि हुने देशको शीर्ष स्थानमा जिम्बाब्बे रहेको छ । सन् २०२२ को अक्टोबर महिनासम्मको तथ्यांक अनुसार वार्षिक मूल्यवृद्धि दर २६९ प्रतिशत रहेको छ । सोझो अर्थमा बुझ्नु पर्दा यस देशमा अघिल्लो वर्षहरुमा १० डलरमा पाइने वस्तुलाई उपभोक्ताले २६९० डलर खर्चिनु पर्ने बाध्यता आइपरेको छ ।

यस्तै सन् २०२२ को सेप्टेम्बर महिनाको तथ्यांक अनु्सार दोस्रो स्थानमा रहेको लेवाननको मुद्रास्फीति दर १६२ प्रतिशत रहेको छ । सन् २०२२ को अक्टोबर महिनासम्ममा भेनेजुवेलामा मूल्यवृद्धि दर १५६ प्रतिशत रहेको छ । हालै गएको महाभूकम्पका कारण समस्यामा परेको सिरियामा मुद्रास्फीति दर १३९ प्रतिशत रहेको छ । सुडानको मुद्रास्फीति दर १०३ प्रतिशत रहेको छ ।

यसरी जिम्बाब्बे, लेबानन, भेनेजुवेला, सिरिया र सुडानमा मूल्यवृद्धि दर शतप्रतिशत भन्दा धेरै रहेको छ ।  यस्तै सन् २०२२ को अक्टोबर महिनासम्मको तथ्यांक अनुसार अर्जेन्टीनामा मूल्यवृद्धि दर ८८ प्रतिशत, टर्कीमा ८५.५ प्रतिशत, श्रीलंकामा ६६ प्रतिशत, इरानमा ५२.२ प्रतिशत र सुरिनेममा ४१.४ प्रतिशत रहेको छ ।

अमेरिका लगायतका अन्य विकसित देशहरुले मूल्यवृद्धि नियन्त्रणका लागि अपनाएको संकुचित मौद्रिक नीति, आक्रामक शैलीमा बढाएको ब्याजदरका लागि डलर बलियो हुँदा उच्च मुद्रास्फीति हुने देशहरुको मुद्रा एतिहासिक न्यून बिन्दुमा पुगेका छन् ।

यस्तै रुस–युक्रेन युद्धका कारण पेट्रोलियम पदार्थको मूल्यमा भएको वृद्धि भएको छ । जसकारण उच्च मुद्रास्फीति भएका देशहरुका जनताको जीविकोपार्जन समस्यामा परेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।