विदेशी मुद्रा सञ्चिति १३ खर्ब ८३ अर्ब, ९.४ महिनाको वस्तु तथा सेवा खरिद गर्न धान्ने

राष्ट्र बैंकका अनुसार माघसम्ममा आइपुग्दा विदेशी मुद्रा सञ्चिति सामान्य बढेको छ। चालु वर्षको माघसम्मको तथ्यांक अनुसार कायम सञ्चितिले ९.४ महिनाको वस्तु तथा सेवा खरिद गर्न धान्नेछ ।

राष्ट्र बैंकको तथ्यांकअनुसार २०७९ असार मसान्तमा १२ खर्ब १५ अर्ब ८० करोड रुपैयाँ रहेको कुल विदेशी विनिमय सञ्चिति सात महिनामा १३.८ प्रतिशतले बढेर माघ मसान्तमा १३ खर्ब ८३ अर्ब पुगेको छ ।

अमेरिकी डलरमा यस्तो सञ्चिति १० अर्ब ५० करोड छ। असार मसान्तमा ९ अर्ब ५४ करोड रहेको थियो ।

नेपाल राष्ट्र बैंकका अनुसार चालु आवको सात महिनाको अवधि अर्थात माघसम्ममा मुलुकको शोधनान्तर बचत बचत १३३ अर्ब पुगेको छ । माघ महिनामा मात्र शोधनान्तर बचत ३६ अर्ब ११ करोड रुपैयाँले वृद्धि भएको हो ।

राष्ट्र बैंकका अनुसार गत आवको माघमा २४७ अर्ब ३ करोडले घाटामा रहेको शोधनान्तर स्थिति १३३ अर्ब २१ करोड रुपैयाँले बचतमा पुगेको हो । पुसको तुलनामा शोधनान्तर बचत ३६ अर्ब ११ करोड रुपैयाँले वृद्धि भएको हो । पुसमा ९७ अर्ब १० करोड रुपैयाँ बचतमा थियो ।

अमेरिकी डलरमा अघिल्लो वर्षको सोही अवधिमा २ अर्ब ७ करोडले घाटामा रहेको शोधनान्तर स्थिति समीक्षा अवधिमा १ अर्ब १ करोडले बचतमा छ।

शोधनान्तर स्थितिमा मात्रै नभई चालु आर्थिक वर्षमा चालु खाता घाटमा पनि उल्लेख्य सुधार भएको छ । चालु वर्षको सात महिनामा सरकारको चालु खाता २९ अर्ब ६४ करोडले घाटामा छ। अघिल्लो वर्षको सोही अवधिमा चालु खाता ४ खर्ब ११ अर्ब ३४ करोडले घाटामा थियो ।

व्यापार घाटामा १८.७ प्रतिशतले घटेको र रेमिट्यान्स २७.१ प्रतिशतले वृद्धि हुँदा त्यसको प्रभाव शोधनान्तर स्थित र चालु खातामा देखिएको हो ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।