सगरमाथा आरोहणका लागि मात्रै ४५४ जनाले लिए अनुमति, ६३ करोड बढी रोयल्टी संकलन

विश्वकै सर्वोच्च शिखर सगरमाथा आरोहणका लागि यस वर्षको बसन्तकालीन यामको लागि मात्रै ६१ देशका ४५४ जनाले अनुमति लिएका छन् । ३६१ पुरुष र ९३ महिला गरी कुल ४५४ जनाले अनुमति लिएका हुन् । यो वर्षको वसन्त याममा सगरमाथा आरोहण गर्ने टोलीहरुको सङ्ख्या ४१ वटा रहेको छ ।

संकृति पर्यटन तथा नागरिक उड्डयन मन्त्रालय अन्तगर्तको पर्यटन विभागले प्रकाशन गरेको तथ्यांक अनुसार अप्रिल २१ सम्ममा १२ जना नेपाली सहित ४४२ जनाले सर्वोच्च शिखर सगरमाथा आरोहणका लागि अनुमति लिएका हुन् । सगरमाथा आरोहणका लागि अनुमति लिएका नागरिकहरुबाट राज्यले ४८ लाख ६४ हजार २९१ डलर अर्थात् ६३ करोड ७४ लाख १३ हजार ७९ नेपाली रुपैयाँ रोयल्टी संकलन भएको छ ।

अन्य २२ वटा हिमाल आरोहणका लागि ५५१ जनालाई अनुमति दिए वापत ७ लाख ५७ हजार २२५ डलर अर्थात् ९ करोड ९२ लाख १२ हजार ३३९ रुपैयाँ संकलन गरेको छ ।

सगरमाथा आरोहणका लागि यो वर्षको बसन्त याममा सगरमाथा आरोहण गर्ने नागरिकहरुमा सबैभन्दा धेरै चिनियाँ र त्यसपछि अमेरिकी नागरिक रहेका छन् । ७१ पुरुष र २५ महिला गरी चीनका कुल ९६ नागरिक वसन्त याममा सगरमाथा आरोहण गर्नका लागि अनुमति लिएका छन् । यस्तै ७४ पुरुष र १३ महिला गरी ८७ अमेरिकी नागरिकहरु हिमाल आरोहण गर्न पर्यटन बोर्डबाट अनुमति लिएका छन् । नेपालबाट १२ जनाले सगरमाथा आरोहण गर्नका लागि अनुमति लिएका छन् ।

सगरमाथा बाहेकका अन्य २२ हिमालका आरोहणका लागि ५५१ जनाले अनुमति लिएका छन् । जसबाट पर्यटन विभागले ९ करोड ९२ लाख रोयल्टी संकलन गरेको छ । ८ हजार मिटर माथि उचाई भएका ७ हिमालको आरोहणका लागि ७५३ जनाले अनुमति लिएका छन् । ८ हजार ८४८ दशमलव ८६ उचाइ भएको सर्वोच्च शिखर सगरमाथा आरोहणका लागि ४५४, ८ हजार ५८६ मिटर उचाइ भएको कन्चनजंगा हिमाल आरोहणका लागि ४२, ८ हजार ५१६ मिटर उचाइको लोत्से हिमाल आरोहणका लागि ९५, ८ हजार ४६३ मिटर उचाइ रहेको मकालु १ हिमाल आरोहणका लागि ५८, ८ हजार १६७ मिटर उचाइ भएको धौलागिरी हिमाल आरोहणका लागि ३५, ८ हजार १६३ मिटर उचाइको मनास्लु आरोहणका लागि १५ र ८ हजार ९१ मिटर उचाइ रहेको अन्नपूर्ण १ आरोहणका लागि ५४ जनाले अनुमति पाएका छन् ।

विभागले हालसम्म विभिन्न २३ वटा हिमाल आरोहणका लागि १०७ वटा टोलीलाई अनुमति दिइएको छ । विभागले १ हजार ५ जनालाई अनुमति दिएवापत ५६ लाख २१ हजार ५१६ डलर अर्थात ७३ करोड ६६ लाख २५ हजार ४०८ रुपैयाँ रोयल्टी संकलन गरेको छ ।

?  समग्र अर्थतन्त्र र सेयर बजारको नियमित अपडेटका लागि हाम्रो फेसबुक पेजका साथै ट्वीटर र युट्युबमा हामीलाई फलो गर्न सक्नुहुन्छ ।